整容失敗之後（下）
上集：https://bit.ly/3lMo1ta
係，我知咁樣好衰，要個妹毀容。
但阿欣係校花級靚女，同埋除咗佢，我真係冇辦法搵到其他女仔，係我有機會落手，落手後又可以勸掂佢唔報警。
我同自己講，我事後會對阿欣好啲，一世照顧佢，甚至再搵過個女仔同佢換臉......
我同阿欣講，朋友介紹咗個好好嘅整容醫生，可以整番好我塊臉，叫佢陪我去。
途中，我故意撞爛佢副眼鏡。
去到醫院後，我遞張手術同意書畀佢：「呢張係家屬同意書，我已經睇晒條款，你簽名就得。」
800度近視嘅阿欣，好快簽咗名，佢點估得到，嗰張唔係「家屬同意書」，而係接受整容手術嘅同意書。
我扮驚，叫佢陪我入手術室，醫生打一支麻醉針，阿欣就瞓低咗。
乜野良心、親情，全部都被拋諸腦後。
嗰一刻，我腦裡面，只有對變番靚嘅期待。
嗰個醫生真係神級，手術後，我所有瑕疵都修復好晒，仲比以前靚咗好多。
而毀咗容嘅阿欣，知道事情始末後，無比震驚。
我不斷勸阿欣冷靜，話會幫佢諗辦法變番靚，可惜阿欣唔聽我講，唔止報警，仲將件事擺上網。
一時之間，全城都知我「賣妹求靚」。
我唔明，點解阿欣可以不顧姐妹親情，將我告上法庭？
證據確鑿，個醫生亦都俾人拉咗。
調查後發現，嗰個醫生原來係心理變態，雖然有神級技術，但佢堅信「呢個世界嘅靚女係有固定數目」。
所以佢幫一個女仔變靚嘅同時，會將另一個女仔毀容。
救一人，殺一人。
咁阿欣咪白白犧牲？嗰一刻，我愧疚之餘，更擔心出獄後，世人會點唾罵我。
靚，講到尾都係為咗其他人嘅目光，如嗰一個女人住喺荒島，唔通仲會搽睫毛液？
但坐監期間，我收到好多男粉絲嘅示愛信，讚我有邪惡嘅魅力、別樹一幟......
我唔再後悔自己嘅決定，傷人、詐騙，坐幾年監，換一世靚樣都好抵，法庭唔會宣判要毀我容㗎嘛。
出獄後，我更加成為全城知名嘅蛇蠍美人，受人追捧，當然亦有好多人鬧我。
我諗番起，整容失敗嗰陣，所有人都踩我，話我醜人多作怪，根本冇人同情我。
唉，人人都識講，內在美更重要。
但大眾嘅目光，永遠只會投放喺外在最耀眼嘅人身上。
有個靚樣，無論內裡幾衰，始終有人鍾意。
所以，先有咁多人搏命追求外在美。
－完－
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #整容失敗之後
Search